Påsketur i Eiksund

Herøy kajakklubb inviterte i dag til ein rolig påsketur, med høg kosefaktor i Eiksund. Åtte medlemmer møtte ved småbåthavna, og etter ei lita økt med påkledning og sjøsetting, la vi i veg i retning Selvågane.

Veret var strålande, med sol og for det meste rolige vindforhold. Det blei mykje snirkling, inn i kriker og kroker og under sjøbuer.

Eg syns denne vesle sjøbuda er utrulig sjarmerande, og etter å ha padla under den er eg ikkje mindre sjarmert! Berre sjå på bjelkane som ber golvet!

Etter å ha utforska Selvågane ei stund, var det tid for ei pause i sola. Vi gjekk i land, og drog kajakkane opp på berget. Matpakker og termosser blei leita fram, og etter ei lita stund brann bålet godt.

Etter matøkta var vi klare for å ta åra fatt på nytt. Vi kryssa Selvågdjupet over til Eika, og padla innover mot Eiksund igjen. Også langs Eika er det flust med kriker og kroker å utforske.

Undervegs blei det også tid til å teste rulleferdighetene som vi har terpa på i bassenget i vinter. Eg har vore litt spent på om rulla ville fungere "i det virkelige liv" også, og begeistringa mi var stor når den satt på første forsøk!